إوعى تنسى

إوعى تنسى

****
افتكرنى بأى حاجه حلوة مره عملتها
ولا تفتكرلى ذكرى وحشة وكلمه جارحه انا قولتها
قبل ممشى عاوزه أقولك ..أوعى تنسى
ان قلبى كان لقلبك دار ومرسى
وجاه ودنيا ملكتها
إوعى تنسى ...
إن قلبى كان مضلل بجناحاته يوم عليك
وانه كان دايما يرفرف
لما يلمح نور عنيك
وان شمس الكون تغيب لو
عيونى ما تلاقيك
رد قولى ..وإوعى تسكت
بعد منى فين تلاقى
معنى للشوق والتلاقى
ده الهوا ونبضه اللى باقى
خطفته م العشاق عشان
لجل يوم أهديه اليك
إوعى تقسى ....
وأنا عمرى ما انسى
ان احلامى اللى بانت
وان اوجاعى اللى هانت
وان ايامى ماكانت
ليها معنى الا بيك
عمرى ماانسى
ان انا ونجومى لسه
سهرانين الليل حيارى
بشوق ولهفه بناديك
لسه ساكت .. مش سامعنى ؟
رد قول بُعدك واجعنى
ولا أقولك ..عادى اسكت
ده فسكوتك احلى همسة
يللى شمس الكون بتشرق من عنيك

*******

ريحاب

مالوش غالى

مالوش غالى

**********

ومن قلبى تجلجل ضحكتى
تملى فراغ الكون
وبسمع فى الصدى صوتها
وبجرى وراه لفين مايكون
فراشه وطايرة تتباهى بألوانها
فـ زمن مجنون
وفجأة ....الدنيا تصفعنى ..تبعتر
فى الفضا حلمى
وشجرة أملى وفروعها
خلاص مالت
لافى بكرة ولا بعده
ولا أيام بتتصاحب
مفيش صاحب
ولا فى قلوب بتتعاتب
خلاص الكل بقا يشبه
ظلام الليل
سواد مبدور مغمى العين
وما له نهار
زمن دوار مالوش غالى
زرعنى فى السما نجمه
بضى الحب بتلالى
رجع غيم ...ورجعنى
مالوش غالى
وضى الحب اصبح نار بتكوينى
وآآآآآآه من آه
وانكتبت على جبينى

*****

ريحاب

جالى قالى

جالى قاللي
.................
قلت ايه للبحر قولّى
أصل هو جه وقالّى
ع الكلام اللى انت قولته
قاللي شافك وانت شوفته
بس قاللي قبل مانسى
كان حزين وانا قولت حسة
بس فاضل برضه لسه
كلمتين واتخبوا عني
إنت قوللي
كونت ساكت غير عوايدك
ليه تداري حاجات بعندك
مانت عارف ان منك
شمس بكرة تكون تملي
ياللا قوللي
برضه ساكت .. عادي إسكت
دا ف سكوتك أحلى كلمة
وف عيونك .. مهما تعند
الحروف م النني باينة
كل م المح حرف اجري
احضن الحرف اللي بعده
حرف حرف لحد فجري
والنهار يحضنى بعده
يعني كل كلمة منك
برضه جاتلي
يبقى اسكت عادي جدا
أصل قلبك.. جالي قاللي

ريحاب

عشقتك

عشقتك

*******

بتمنى الكل يجيب سيرتك
وبغير لو حد يجيب سيرتك
مجنونة ومش قادرة اتصوّر
غير إنّي وبس اللي حبيبتك
النار القاها ف قلبى تقيد
والشوق جوايا لهيبه يزيد
مع ان القلب بيبقى سعيد
عشان انا وحدى اللى اميرتك
بتمنى اكون شمس تدفيك
واطوف بحنانى كتير حواليك
من عين الكون كله اخبيك
ياحبيب العمر... دنا اسيرتك
ادينى ايديك وتعالى نروح
لنجوم الليل والقمره نبوح
وتقولى عاشقنى ياروح الروح
وانا اقول من قلبى انى عشقتك
من خوفى الدنيا لـ تلعب بيك
راح اوصي نجوم الدنيا عليك
تحميك وتطوف دايما حواليك
وف قلب القلب اشيل صورتك
دنا بيك يا حبيب القلب اكون
من غيرك عمري ف لحظة ما اكون
حضنك ف عيوني بكل الكون
وكفايا عليّا اني اخترتك

يالقلــــــــــب السجيـــــــــن

فوق يا قلبي السجين

قول كلمتين

واترحم على فراقى

إنزف حنين دمعتين

تسيل فى أوراقى

ما الوحده طوق مطلوق

ينهش فى أحشائى

واليتم خوف مكتوف

يعزف لأشواقى

وموت يزف الموت

لقلب مش باقي

ومنين نجيب الحب

وهو... نفسه

مــش لاقــي

ســـــــى السيد

من نظرة عين بفهم طلبه

وبنفذ على راسي وعيني

يكفيني ياناس منه حنانه

يكفيني بعطفه مغطيني

سي السيد طلباته أوامر

وعليّا وبس أقول حاضر

لو وسط جبال تلج أخاطر

وارجعله لحضنه يدفيني

يتغرّب ويقاسي عشاني

وبقلبه يجيب اللى اتمناه

وان حس ف لحظة بأحزاني

يبعتلي الروح تداويلي الأه

بستنى رجوعه بشوق وحنين

والثانية تفوت على قلبي سنين

دنا ويّا الروح بنكون مساكين

تايهين ووجوده بيحييني

سى السيد على راسى وعينى


لو قولت الأه.. قبلي يقولها

وانام الليل ويبات سهران

وتعدي ساعات ياما بطولها

ف عيونه دموع وبشوق قلقان

يرقيني يطبطب ويسمي

ف عيونه أمان وحنان أمي

شقيان وكمان بيشيل همي

من نسمة تعدّي يخبيني

سي السيد.. على راسي وعيني

برمشـــه عيـــن

بقلبى انين

وانا يحبيبى بعيونك بالاقى حنين

برمشه عين بتوحشنى ولو تبعد برمشه عين

وقادر بين اديك لاتنين

ترجعنى لطفل جنين

بتقدر منى تسرقنى

ف بحر عنيك تغرقنى

تخلينى ولا العاشقين برمشه عين

وديما شوقى يعطش ليك

ويهرب منى يجرى عليك

وانا وقلبك نطير دايبين برمشه عين

وآه من شوقى ياعمرى

ياطووول صبرى

وليه بالفرقه متواعدين ؟

ليه متواعدين؟

وقلت يومين.... يومين اتنين

وادينا سنين فشوق صابرين

برمشه عين

بيبان مقفوله تتفتح

ورود الحب بتفتح

وانا وانت ف ربيع عايشين

برمشه عين

وجــــــــع

فاض من ضلوعنا الوجع

غرق مطارحنا

قافلين بيبان الامل

ولا جينا ولا رحنا

تبت ف جوفنا الالم

غير ملامحنا

وما نابنا غيرالهوى

نَكِس جوارحنا

وعناقيد عذاب وفراق

طارحه بأرواحنا

ونبقى صحاب الفرح

وضيوف ف أفراحنــــــــا

نبضـــة شـــــوق

لساك متعبتش م الفرقه لســـاك متحمل؟

لساك من قلبك بتكابر ومصِر تكمـــــــــل؟

لسااااااك قادر ؟

لسااااااك فاكر؟

لساك ف الدنيا الكدابه عشمان متأمِـــــــل؟

على جرح بينزف بتدارى ووجعك متكمم

إرمى همومك جوه ضلوعى ومكانك أتألم

د أنا منك ياحبيبى ومنك

قلبى ف حبك لساه جاهل وبيتعلـــــــم

والشوق بقا ينبض جوايا شويه شويه رح يتكلـــــــــــم

مشتاق للنظره المكسوفه

مشتاق للكلمه المخطوفه

لما نقرب ولا نسلــــــــــــــم

وعيون العشاق تحكينا

ونجوم السما هتغطينالما هنتلاقى ونتلملــــــــــــم

والشوووق .. بيرج ف أركانى

بيدوى مزلزل وجدانــــــــــــى

وإنشرخ القلب ومن هجرك بقا يتظلـــــم

يافايتنى ف غربه أوطانى

ورامينى ف كوكب حرمانى

ومرافق صبرك ومسلِــــــم

د أنا منك ياحبيبى ومنك

قلب الطفله رح يكبر بكره ويتعلــــــم

رح يكبر بكره ويتعلــــــــم

ضيــــــف شـــــــرف

إنفرتى يالحبات.. حبه حبه

وغيب يافرحـــــى واستخبـــــــى

وشيب يا قلب بدون أحــبه

وإدبل كمان.. مش هتحييك الاطبا

إنفرتى يالحبات خلاص..مش باقى منــــــــــــى

غير ضيف شرف ..ومفارق مش مستنـــــــــــــــى

خلاص بطلت اضحك ولا افرح ولا

اغنـــــــــــــــــــــى

تاهت ملا محى من ملامحى وانطمست غصب عنـــــى

وكل وريد جوايا بيعلن انه اتبرأ

منــــــــــــــــــــــــــــى

عيون رايحه ..عيون جيه........ تعرينـــــى

وتقسمنــــــــــــــــــــــى

ومين قوانى ماكسرنـــــــى؟ إدانى ما أخد

منـــــــــــى

ونزف جروح وعجز الروح

مشنكلنــــــــــــــــــــــــــى

وبسأل مين زرع خوفى وبكفوفــــــى

مشكلنـــــــــــــــى؟

ومين شهانى لحنانى ..وسلمنى لحرمانى

ف طبق فضه لأحزانـــــى

يقدمنـــــــــــــى ؟

خطاوي الوصل مبتوره

فكو كب فاضى مهجوره

ونار الشوق ملحقانــــــى

بتشغلنــــــــــــــى

اداعب قلبى بكفوفى

وادفن وجعى ف كسوفى

وأمنى خوف بيقتلنـــى

واعاتب دنيتى واسأل وماالقى جواب

يطمنـــــــــــــى

سؤال حايرشاغل بالى

بيسألنى على حالى ..

على ليالى كانت ف نجومهاتغزلنــى

وع القمره تحددنى وترسمنـــــــــــى

****

فينها الليالى دى الى يامه اتغزلت

فيــــــــــــــــا

ومين قتلها ولا استقتلت هيـــــــا

فاتت ديارى خاليه ليه واستهترت بيــا

كفنتنى جوه روحى

شربتنى كاس جروحى ولا لاقيه دوا ليــــا

كبرتنى جوه سنى صغرتنى جوه منى

وعيزه تلقانى وفيـــــــه

علمتنى ابقى قاسيه

ابقى ناسيه

ابقى راسيه

وماأسأل ع الى حواليــــــــــه

صعب ارجع تانى ليه بروح قويه

دنا دمعه ف سور الضحكه متخفيه

بموج البحر متوضيه

ف وسط الشط مستنيه

بدعى وراسى مرفوعه ومصليـــــه

ترجعلى روحى من تانى بضحكتها متحنيه

يوم ما انقسمنا

يوم م افترقنا
انتَ و انا
كنا هنا
ف نفس المكان
وإدينا لمّا سلِّمت
نطَقِتْ عيونّا اتكلِّمتْ
سكتْ اللسان
صوتي بكىَ من خنقته
واتلجِّمت فيه كلمته
معقول يضيع
حبه وحنانه ولهفته ؟؟
معقول اسيب
حضنه وعيونه ورِقِّته ؟؟
معقول يعيش ؟؟
قلبي بعيد عن ضحكته ؟؟
نبضي بينطق .. كتِّفيه
وفـْ توب فؤادك شبِّكيه
إخنقي نبضات عذابك وإلحقيه

مدّي إيد الحلم فيه
وانزعي الخوف اللي بيه
ليه فـِ كونك
كلّ كونك
وانتي ليكي الحق فيه
إنتهيت وقت امّا فارق
قلبي قالّي " نعمل ايه "
شُوقي أرسل ليه رساله
قُلْت فيها .. " وحشتني "
إرجع تعالى وضمنى
إرحم دموع قلبي
وعنيّا
وضمّ شوقي بشوق
تعالى ... أسرتني
واتقسمنا اتنين فـ لحظه
وانتهينا بـ رمش عين
واللي باقي قلب تايه
جوّه طيّات السنين
كل يوم ازداد حنين
كل يوم اشتاق إليه
همس صوته
لمس إيده
ضحكه خارجه من عنيه
حلمي مات
عمري فات
والليالي
شريط حزين للذكريات
والأماني
كلّ يوم بتموت غريقه
جوّه بحر من الأهات
والأغاني الحلوه دبْلت
لمّا كبِّلها السكات
حتى أرض الأمْنِيَات
طرحها فُرقه و شتات
والزهور ماتت حزينه
والربيع أصبح رُفات
وآدي حالي من سنين
قلبي ساكن فيه أنين
دمعتي بتغني دايما
لحن موّالي الحزين
دمعتي بتغني دايما
لحن
موّالي
الـ
ح
ز
ي
ن
بقلم / ريحاب محمد