بطل جنان

بطل جنان

مرهون سعادتى بضحكه فاتره
وكلمه حلوة مزيفه
وآآآآه بتصرخ جوه منى
بين ضلوع متكتفه
وأدارى وأضحك بالقوى
مع ان قلبى مش قوى
وده لجل غيرى يتلوى
وناس تعيش متكيفه
وأخاف أبين حرقتى
وعيون ماترحم دمعتى
وأدفن مشاعرى ف وحدتى
وأبان كمان متلهفه
على أيد بتخنق صرختى
وعيون بتقتل دمعتى
وتعيش ملايكه مرفرفه
فقلت... نافق والسلام
يعنى انت شارى للكلام
هجيب منين يعنى لسعادتك
قلوب معاك متألفه
وياقلبى ...إحذر م الحنان
كفايه ذوق بطل جنان
خلى البراءه جوه منك
فوق الضلوع متستفه

فــ حضن الليل

ف حضن الليل وأنا سهران
بداعب قمرى وبحايله
لقيت ضى القمر زعلان
لجل حبيبى مش طايله
قعدت ارسمله ع القمره عيون صافيه
شعاع الشمس عز البرد
لما تهل يوم دافيه
قعدت ارسم كمان ضحكه
بتشرق منها احلامى
وتحلى بيها ايامى
مهما تكون ف يوم جافيه
رسمت جناح ...وقلب براح
ونسمه تهل كل صباح ... تصحينى
بعطر حبيبى تحينى
ودمع عيونى على خدى مغطينى
على عينى .. حبيبى أبكى
وما ألقى إديك بحنيه تلملم جرحى ..تداوينى
قعدت احكيله كان يامكان
عن القلب اللى كان دنيا
ما بعرف فيها ايه معنى
حروف أحزان
عن اللمسه اللى كات مرسى
ومهما الدنيا كات تقسى
بتبقى عيونه بر أمان
وعن حضنه اللى لو عشت الزمن كله
هموت جواه وأقول عطشان
لإحساسه ...لأنفاسه
لضمه تاخدنى م نفسى
وتسقينى الحنان ..بحنان
قعدت احكيله واحكيله
وقمرى فدمعه ياويله صبح غرقان
على الورده اللى يوم دبلت
عشان مرويه بالحرمان
وقبل ماأقول وداع ...وأمشى
وأغمض ع الوجع رمشى
بآخر دمعه من عينى
مسحت الرسم والألوان

إوعى تنسى

إوعى تنسى

****
افتكرنى بأى حاجه حلوة مره عملتها
ولا تفتكرلى ذكرى وحشة وكلمه جارحه انا قولتها
قبل ممشى عاوزه أقولك ..أوعى تنسى
ان قلبى كان لقلبك دار ومرسى
وجاه ودنيا ملكتها
إوعى تنسى ...
إن قلبى كان مضلل بجناحاته يوم عليك
وانه كان دايما يرفرف
لما يلمح نور عنيك
وان شمس الكون تغيب لو
عيونى ما تلاقيك
رد قولى ..وإوعى تسكت
بعد منى فين تلاقى
معنى للشوق والتلاقى
ده الهوا ونبضه اللى باقى
خطفته م العشاق عشان
لجل يوم أهديه اليك
إوعى تقسى ....
وأنا عمرى ما انسى
ان احلامى اللى بانت
وان اوجاعى اللى هانت
وان ايامى ماكانت
ليها معنى الا بيك
عمرى ماانسى
ان انا ونجومى لسه
سهرانين الليل حيارى
بشوق ولهفه بناديك
لسه ساكت .. مش سامعنى ؟
رد قول بُعدك واجعنى
ولا أقولك ..عادى اسكت
ده فسكوتك احلى همسة
يللى شمس الكون بتشرق من عنيك

*******

ريحاب

مالوش غالى

مالوش غالى

**********

ومن قلبى تجلجل ضحكتى
تملى فراغ الكون
وبسمع فى الصدى صوتها
وبجرى وراه لفين مايكون
فراشه وطايرة تتباهى بألوانها
فـ زمن مجنون
وفجأة ....الدنيا تصفعنى ..تبعتر
فى الفضا حلمى
وشجرة أملى وفروعها
خلاص مالت
لافى بكرة ولا بعده
ولا أيام بتتصاحب
مفيش صاحب
ولا فى قلوب بتتعاتب
خلاص الكل بقا يشبه
ظلام الليل
سواد مبدور مغمى العين
وما له نهار
زمن دوار مالوش غالى
زرعنى فى السما نجمه
بضى الحب بتلالى
رجع غيم ...ورجعنى
مالوش غالى
وضى الحب اصبح نار بتكوينى
وآآآآآآه من آه
وانكتبت على جبينى

*****

ريحاب